أبو شنب و حكاياته العجب

  - يا جماعه فكوني مش هكتب حاجه. - بس ياض ... اسكت خالص ... بلاش مقاومه و الا هنحلق شنبك. - ليه بس ... انا بفضفض بكلمتين بدل ما افرقع ... انا لا بهش و لا بنش. - اسكت قلنا خلي اليومين ... تلاته ... خمسه دول يعدوا على خير ... اسكت بنقلك. - حاضر هسكت بس بلاش ضرب ... قلت خلاص هسكت ... أي أي ... ما قلت بلاش ضرب . - ما انت بتتكلم اهو و بتقول بلاش ضرب ... مهو دا في حد ذاته كلام تستحق عليه الضرب ... أيوه كدا اخرس ... شاطر ... أخر قلم و مش هنضرب تاني ... شطووور .. نام كام يوم كدا و بعدين نفكك.

  - خف شويه من الأكل ... كرشك كبر و خدودك بقوا زي البلالين. - مش انت اللي قلتلي البطيخ مفيد جدا و صحي كمان. - انت باين عليك غلبان ... افهم يا عمنا ... انا قلتلك كدا علشان خايف عليك ... انت بتلخبط في الكلام و الحيطان لها ودان. - هو انا قلت حاجه غلط ... انا اتكلمت بحسن نيه ... طيب يعني أكل بطيخ و لا استنى أي حاجه من الحاجات الحلوه ؟ - طيب ارد عليك اقول ايه بس ... كل بطيخ و خلي بالك من اللب ... كل يا طيب . - طيب اتفضل معايا ... دا طعمه حلو بجد و احمر و مرمل. - لا معلش اصلهم مستنيني ... هبقى احكيلك أكلنا ايه في العزومه.

  - باشا ... أنا جعان ... البطيخ مش أكل ... و أنا ورايا شغل كتير محتاج صحه تمام . - استحمل شويه ... مفيش فلوس نجيبلك غير البطيخ ... و بقولك ايه اوعى تقصر في الشغل . - مفيش فلوس ازاي؟!! ... انا شامم ريحه ترد الروح ... انت عامل عزومه؟ ... طيب ما انا استحق احضر العزومه . - اشتغل و ركز في شغلك ... و بطل تهيئات ... انا بيجيلي شكاوى منك كتير . - كمان بيشتكوا !!! ... طيب يا سيدي اديني حاجه من اللي بتفرقها دي علشان اقدر اقوم . - أكل ايه بس اللي بتفكر فيه !!! ... تعالى كمان شويه احكيلك حكايه عن كفاحي اللي وصلني للي انا فيه ... كل بطيخ ... كل يا راجل و عيش.

  - بتعمل ايه ياصاحبي ؟ - طالع فوق معاهم ... واحده واحده بس هوصل ... بالإجتهاد و الصبر و الإصرار . - مين قالك ان هو دا الطريق ؟ - كلهم فوق بيقولوا كدا ... و كل شويه ينادوا عليه و يشجعوني و يحكولي حكاياتهم. - يا بني دول بيضحكوا عليك ... محدش منهم وصل كدا خالص ... طيب ما اخدتش بالك ان و هم بيشجعوك في حجاره بتقع على راسك . - اخدت بالي ... بس دا طبيعي ... دا جبل و مليان حجاره ... يعني ممكن من الهوا ... او حيوان صغير بيتحرك من مكان لمكان . - يا صاحبي يا طيب ... روحك هتطلع قبل ما توصل عندهم ... و الحجاره اللي بتقع مش صدفه ... تعالى اركب معايا ... مش هتوصل غير كدا ... يا صاحبي تعالى فهكذا وصلوا.

  - أوباااا ... إيه ياعم الروقان دا ... اللي علي علي ياعم ... اللي اداك يدينا يا سيدي. - حيلك حيلك ... دا حلم يا أبو عين يدب فيها رصاصه ... أنا نايم و بحلم . - حلم إزاي يعني ؟! - بص كدا حواليك ... معقول أنا و أنت نيجي مكان زي دا في الحقيقه ... إحنا أخرنا سيدي بشر في اسكندريه ... و بعدين مش واخد بالك ان مفيش كرش ؟ - أه صحيح ... الكرش فين؟ ... و أنا هنا بعمل ايه!! - انت هنا علشان تضيع فرحتي و تنغص عليه عشتي حتى في الأحلام. ... روح يا عم إلهي يطلع عليك حوت أعور يبلعك ... مستكترين علينا حتى الاحلام يا ناس يا ظالمه.

  - شبيك لبيك ... يا بني أدم أنا ملحقتش أدخل المصباح ... اهدى على نفسك شويه ... انت طلباتك كتيره كدا ليه؟ - أنا حر يا أخي ... انت شغلتك تلبي طلباتي ... اشتغل و انت ساكت. - يا رب صبرني ... طيب اتفضل سيادتك ... اطلب جنابك ... أوامرك. - الأول قولي هو في جني بيلبس نضاره شمس ... هههههه ... الدنيا شمس جوه!! .... و ايه الالوان اللي انت لابسها دي!! ... دا لون دا ؟! - يا عم انت مالك ... انت لك تطلب و الطلب يجيلك ... ركز يا بني أدم ... و بعدين اطلب طلبات مفهومه علشان اجبهالك صح و نوفر وقت و مجهود ... سيبك من لبسي و شكلي ... ركز يا .... - يا إيه؟ ... اظبط الكلام و خلي بالك لو شتمت من ورايا هيبلغوني ... العصافير كتير ... روح هاتلي أكل و عصير و سجاير و هدوم و و و شوية حاجات تانيه ... و خلي بالك لو الحاجات مجتش زي ما قلتلك بالظبط هرجعك بيهم .

  - انزل يا بني ربنا يهديك ... بتعمل إيه عندك؟ - بسمع حكايات ليها العجب ... العصافير دول عارفين حاجات كتيره ... لما أنزل هحكيلك ... أه لو تسمع اللي بسمعه ... هتتجنن . - لا تحكيلي و لا احكيلك ... كلها حكايات خايبه مش هتفيدك لكن هتضرك. - ازاي مش هتفدني؟! ... دا انا ممكن اعمل بيها عمايل . - كان غيرك عمل ... اسمع مني كل لما تعرف اقل ترتاح اكتر ... يا ابني المصالح بتتصالح و المحبه و العداوه بتتغير مع تغير المصلحه ... شبكه معقده و الداخل فيها لو مش عنكبوت زيهم هيبقى ضحيه .