أبو شنب و حكاياته العجب

  - الأستاذ اللي واقف أدام ... ارجع ورا لو سمحت ... انت واقف كدا ليه؟ = واقف بتصور معاكم ... و بالمناسبه أنا مهندس . - يا عم أستاذ أو مهندس معدتش تفرق ... اقف ورا خالص ... كل واحد في ترتيبه و انت مكانك ورا الاستاذ الطويل اللي هناك دا. = وراه ازاي ؟!! .. انا كدا مش هبان خالص ... و بعدين ازاي ترتيبي في الاخر كدا ... انا مؤهلاتي و خبرتي تخليني. - شششش ... انت هتحكيلي قصة حياتك ... حد يرجع البيه دا ورا ... مش عايزين صداع ... و ايه اللي انت لابسه دا ... شاحت البدله دي منين؟ = لا مسمحلكش ... دي بدلتي بس انا خسيت . - دا كمان هيحكيلي عن الدايت اللي عمله ... ايه يا جماعه حد يشوف قصة الراجل دا ... مؤهلاتك و خبرتك دول في مكان تاني ... الدنيا هنا مختلفه ... يلا يا بابا ارجع ورا ... يلا يا حبيبي ارجع مكانك و انا هجوزك هنومه .

- الحقني يا صاحبي ... قول له كفايه انا حرمت. = أقول له ليه انت تستاهل ... فاكر لما حذرتك و قولت لك كفايه بوستات ... فاكر لما قولت لك ان في ناس بتتفرج عليها و تبعتها لناس تانيه و يمكن حد يشيلهالك في نفسه و يزعل منك. - اه فاكر ... مش وقت عتاب يا عم ... شاور له من عندك احسن مش سامع صوتي او مش عايز يسمعه. = فاكر لما عملت مش فارق معاك و فضلت تقولي اعمل ايه مهو بدل ما اطق من جنابي ... اشرب بقى ... خليه يعلمك الصبر . - يا سيدي فاكر ... ما انا افتكرت ان مفيش حد بيقرأ طالما مفيش اي اعحاب و لا تعليق. = الناس كلها ناصحه الا انت ... بيشوفوا و يعملوا عمي ... و يسمعوا و يعملوا طرش ... و لسانهم اللي طوله متر مخبينه في بقهم و مبيطلعش الا على اللي يقدروا عليه و بس. - طيب ايه ؟ ... هتسيبني كدا ؟ = لا طبعا ... انا هشجعه يضربك اكتر ... امال مهو لازم يعرف اني حبيبه هو و مش متعاطف معاك ... سلام يا صاحبي.  

  - خد ياباشا الملف دا راجعه و صحح الأخطاء اللي فيه. = ملف ايه اللي اراجعه ... أنا مالي و مال الملف دا ... دا يا سيدي مش شغلي و لا يخصني. - مش انت عملته قبل كدا مره ... و بعدين محدش بيعرف يعمله صح غيرك ... خليك جدع متحبكهاش. = انت بتعاقبني اني ساعدتك ... و بعدين لو مش بتعرف تعمله اتعلم ... يا باشا شغلك و انت حر فيه. - انا لحد دلوقتي بسايسك و اطبطب عليك ... مهو هتعمله يعني هتعمله ... شغلك مش شغلك هتعمله . = اجيب بس وقت منين ... كلك نظر ... انت شايف الشغل اللي عليه و اللي نصه مش بتاعي أصلا. - يا عم اخلص انا مش فاضيلك ... ورايا اجتماع مهم و الملف دا أساس الاجتماع ... و لو اتعمل صح هترقى و مرتبي يزيد ... اسهر شويه و كمل لما تروح ... و حسك عينك حد يعرف انك بتعمل الشغل بدالي ... هي الدنيا كدا ناس شايله ناس على كتافها.

  - مالك يا هندسه؟ = مالي إيه؟ ... أنا زي الفل أهو ... خير بتسأل ليه ؟ - يعني مش طبعك تقعد هادي و ساكت كدا ... يعني ملكش أي دور في الأحداث . = يا عم شيلني من دماغك ...ريحها شويه أحسن تتجنن ... إنت إيه يا عم مش عارف تخليك في حالك و تبطل فلسفه و تحليل ... الدنيا مش مستاهله و مفيش أحسن من الزهد في الدنيا ... خليك في حالك و سيبها على الله. - الله الله ... إيه الحكمه و العقل دا كله ... الله يرحم ... مش بقولك انت مبقتش انت. = يا عم بص كويس ... اللي قدامي مستني كلمه ينشرها و اللي ورايا أي حركه مني هيعجني ... شوية حكمه و زهد على لما الريح تعدي ... الصبر و السياسه يا هندسه علشان نعرف نعيش .

  - تمام كمل كمل و بعدين شفت إيه تاني ؟ = يوووه بلاوي بعيد عنك ... مهو أصل من فوق الغصن هنا بشوف البعيد و القريب ... و طالما بتفرج و أنا ساكت فمحدش حاططني في دماغه. - و مستحمل ازاي تشوف دا كله و تسكت ؟ ... دا أنا مرارتي قربت تفرقع من كام حكايه سمعتهم ... أمال انت اللي شفت بنفسك. = أهو في الأول تعبت شويه و بعد كدا جسمي نحس و بقيت جبله زي ما انت شايف. - هههههه يا أخي متقلش على نفسك كدا ... انت جميل . = جميل ايه بس ... دا الناس الطيبين اللي انت شايفهم واخدين راحتهم ادامي على الاخر ... يا راجل دول ناقص يقلعوا و يلبسوا ادامي كاني مرايه . - طيب و بعدين ناوي على إيه ؟ = ناوي أزقك من على الغصن تقع تكسر رقبتك ... دا انت قاعد تسمع الحكاوي بقالك ساعه مهنش عليك حتى تسقفلي ... أنزل داتك خابط في نفوخك ... سيبني اتفرج عايز أعرف هيعملوا ايه مع الزياره اللي جايه.

  - إيه رأيك .. كلام مين اللي طلع صح؟ = كلامك إنت .. بس المنطق يا صاحبي و اللي مكتوب في الكتب بيقولوا غير كدا. - منطق ايه و كتب ايه ... انت بس اللي عامل نفسك فيلسوف و بتفهمها و هي طايره . = مش انا لوحدي اللي فهمت كدا ... كل الناس كانت بتقول كدا. - اهي دي الحاجه اللي تغيظ ... كل الناس فهمت ... كل الناس بتقول ... نفسي اعرف مين اللي بيطلع الفكره اللي كل الناس مره واحده بيتفقوا عليها. = مهو فلان بدون ذكر إسمه قال كدا و دا المفروض يعني جوه المطبخ و شاف بعينه و سمع بودانه. - ياهندسه مش كل اللي شاف بعينه فهم اللي شافه و لا كل اللي سمع بودانه عرف يفسر معنى الكلام. = طيب تمام ... انت شفت و فهمت و سمعت و فسرت ... قلي توقعاتك ايه؟ - لا اقولك و لا تقولي ... و لا منطق و لا كتب ... اللي يحصل يحصل متشغلش بالك و لا تشغلني .. اجري الحق مكان في العربيه ... توصل بالسلامه .

  - و بعدين يا هندسه هنلاحق على الناس دي ازاي ؟ ... مبيشبعوش و لا حتى بياكلوا على اد بطنهم و مفيش فلوس نشترى أكل. = و لما انت عارف ان مفيش فلوس نشتري لما سألك ليه قلتله كله تمام و الدنيا زي الفل؟ - أعمل إيه بس ... ما انت عارف انه مش بيحب يسمع ان في مشاكل ... انا على يدي كل لما كنت تقوله على مشكله يهلل و يطلعك انت اللي غلطان . = مش عارف اقولك إيه ... أهو على الأقل أدام ربنا عملت اللي عليه و قلت الحق . - محدش بيحب يسمع الحق ... اللي فوق عايز اللي تحت يشيل الهم و ميشتكيش ... يحل مشاكله و مشاكل اللي فوق لوحده من غير مساعده و يعترف بمسئوليته عن أخطاء اللي فوق و يتحمل اللوم من غير ما يتكلم. = تمام أوي ... بما إنك فاهم كدا و مقدر اتفضل شوف جزار طيب و اضحك عليه بكلمتين و هات منه لحمه على قد ما تقدر و تعالى بسرعه اعمل الاكل دا كله لوحدك ... انا هروح أريح شويه ... مش عايز أسمعك بتشتكي و لا تقول تعبت ... و لو الجزار مرضيش يديك الا لما تدفع المتأخر دور على غيره ... افتح أسواق جديده.

  - طيب و اللي بيحصل دا ليه بيحصل؟ = الإجابه سهله و كل الناس عارفينها ... دا انا كل لما اتكلم مع حد صغير أو كبير يقولها ببساطه و من غير فلسفه. - أيوه يعني الإجابه تونس يعني؟ = طالما صاحب العزبه الطيب مش بيراعي عزبته بنفسه و يراقب و يحاسب يبقى كل واحد يقدر يقطف ورده هيقطفها ... و اللي يلحق ياخد مانجايه من على الشجره هياخدها ... و اللي عطشان هيشرب لبن بدل الميه ... و اللي جعان هيدبحله معزه مش فرخه. - طيب ما دا بيحصل في كل حته و الدنيا ماشيه ... ما انت عارف الخير كتير ... ليه هنا الدنيا خربانه؟ = علشان هنا المنافسه غشيمه ... اللي مش بيعرف ياخد حاجه من شجره بيحرقها علشان غيره مياخدش منها ... و عنده يسم البقره و تموت أحسن لو مش هيشرب من لبنها ... يعني فيها لأخفيها. - طيب حد يتكلم معاهم و يفهمهم ... الخير كتير و يساع الكل ... و العزبه لما تكبر و تعمر الخير اللي بياخدوه هيكتر. = سدين ودانهم و مغميين عنيهم ... ربنا يسترها على الغلابه اللي ملهمش ذنب . - طيب هات شويه من الشاي اللي في إيدك بدل ما قلبلك الكبايه ... فيها لأخفيها.

  - صباح الخير يا عموره ... شايفاك نشيط و صاحي بدري و جاي تصطاد كمان ... إيه الحكايه؟ = أهو بغير الستايل بتاعي و بتفاعل بنفسي زي ما قالي . - هو انت لسه متأثر بكلامه ... مش كل الناس قالولك كبر دماغك ... هو بس زيه زيهم عايز غيره يحل مشاكله و يتحمل نتيجة قراراته و يتلام بداله و من سكات لايرد و لا يدافع. = طيب و الحل ؟ ... كل واحد له طاقه للصبر و التحمل ... مهو مينفعش هم يعيشوا و احنا نموت بالبطيء . - الحل حاجه من اتنين ... تسيب مصر كلها و تهاجر لبلد فيها الناس ناس بجد ... أو تبقى زيهم ... و لو مش عاجبك دا و لا دا يبقى الصبر ... و على رأي المثل أصبر على جارك السو.

  - يا هندسه هو دا الحل الوحيد علشان تعرف تعيش معاهم ... جسمك معاهم و عقلك في حته تانيه ... لكن هتفضل توزن كلامهم و أفعالهم بميزان الحق و المنطق هتخسر صحتك و عقلك ... و طول ما انت مش قادر تستوعب ان المصلحه الشخصيه فوق أي إعتبارات أخرى هتفضل زي ما انت محلك سر ... و يمكن تنزل لتحت بدل ما تطلع لفوق ... مش بقولك اشرب حاجه كدا و لا خد حبايه كدا ... لكن اتعلم تبصلهم بعنين ازاز و تسمعهم بودن من طين و ودن من عجين ... حافظ على عقلك يمكن تحتاجه في حته تانيه.

  - اتعدل يا متهم ... يا مجرم يا عديم الإنسانيه ... اتعدل بدل ما أخبطك ألمين يوقعوا سنانك. = بالراحه عليه يا باشا ... أنا راجل محترم و الله. - محترم إيه و بتاع إيه ... جايلنا في إيه انطق؟ = في كارت. - نعم يا خويا؟ ... كارت !! ... انت هتعملي فيها مجنون ... لاااا دا أنا الجنان نفسه ... اتكلم كويس أحسنلك. = أنا هشرح لسيادتك ... هم قالولنا أهم حاجه المكن ميقفش ... و لو المكن عايز حاجه تسيب كل اللي في إيدك و تجري تجيب المطلوب ... و من ساعاتها و المكن مبطلش طلبات ... المكن يجري و يجرينا وراه و أدامه و حواليه ... تعبنا يا باشا و الله و بقينا نكلم نفسنا. - امممم اخلص و بعدين. = يعني سيادتك عارف احنا مش جن و لا سحره ... في حاجات بتقع مننا ... حاجات ملهاش دعوه بالمكن ... بس و اديني زي ما انت شايف سيادتك مشرف ادامك . - يعني باختصار مغفل ... بتصدق ان الشغل اهم من تظبيط الشغل ... تستاهل كل اللي بيجرالك ... و لسه هو انت شفت حاجه ... دا انت هتتهري ضرب.

  - بس يا سيدي اهو للمره التانيه يجي ياخد اد كدا من غير ما يعمل حاجه و يمشي ... و احنا زي ما انت شايف بناخد في اجنابنا كلام زي السم و خلاص. = طيب هو لما عملها معاهم أول مره ليه خلوه يعملها التانيه؟!! - مش عارف ... هم في كل الاحوال مش خسرانين حاجه من جيبهم ... الخير كتير و صحاب الجنينه ناس طيبين. = طيب جميل .. انتم كمان اطلبوا يمكن الخير اللي طاله يطولكم و ساعتها تجيبلنا دفايه بدل البرد اللي كسر عضمنا. - انت باين عليك عبيط و البرد لحس دماغك ... احنا مين اللي نطلب ... اقولك ايه بس خليني مؤدب علشان لو حد سمع اللي بقوله ميزعلش ... المهم تفتكر هيجي تاني و لا دي اخر مره ... مالك عنيك احولت ليه ؟ ... ايوه عادي ممكن يجي تاني و ياخد عادي ... بقولك الخير كتير.

  - أدينا وصلنا في غمضة عين ... إيه رأيك ؟ = مستحيل ... إنت إزاي عملت كدا ... إحنا بنحلم صح؟ - أكيد بنحلم ... محدش بيوصل للقمر راكب مركب ... و خلي بالك اللي معاكي أحسن بحار ... بحور الشعر مملكتي ... و خيالي واسع زي السما. = و لما انت كدا زي ما بتقول ايه اللي مصبرك على اللي انت فيه ... ليه مش عايش زي ما بتتمنى . - علشان مقدرتش أضحي علشان أحقق أحلامي ... الواقع كان أقوى مني ... أو أنا اللي استسلمت بسرعه ... مفيش حاجه في الدنيا ببلاش ... لازم تدي علشان تاخد ... كل شيء له تمن . = يا خساره ... طيب و ناوي على ايه؟ - ناوي أرجع بيكي الأرض قبل ما النهار يطلع ... و يا عالم يمكن في يوم أجيبك هنا تاني و إحنا صاحيين.

  - حتى انت يا صاحبي بتركب الموجه !! ... يا خساره دا انا كنت بقول انك صاحب مبدأ. - و مين قال اني اتخليت عن المباديء. ... انا بس تعبت من كتر ما الموج كان بيخبطني في ضهري و دماغي ... و صعبت عليه نفسي من كتر ما شفت ناس أقل مني في كل حاجه الموج بيرفعهم لفوق اوي ... و رقبتي وجعتني و انا ببصلهم من تحت الموجه و الميه المالحه قربت توصل للرئه و تخنقني. - طيب ما انت شفتهم لما الموجه اخدتهم تاني لتحت ... و فيهم اللي غرق و اللي اترمى على الشط زي القتيل. - دول اللي نسيوا انها موجه بتطلع و تنزل ... لما طلعوا لفوق افتكروا نفسهم فوق جبل ثابت ... اللي يفهم الدنيا و أحوالها بيعمل حساب للايام و بيحترم قانون التغيير ... جمد قلبك يا صاحبي و اتعلم تركب الموجه.

  - شوف يا عزيزي في الأوقات الصعبه اللي زي الفتره دي لازم نوفر ... يعني مثلا ليه تاكل ساندوتشين فول و اتنين طعميه ... كفايه اوي ٣ فول ... الفول بروتين نباتي مفيد. ... الطعميه فيها زيت و الزيت مضر بالصحه . - طيب سيادتك الفسفور كمان مفيد للصحه. ... هههههه ... انا مقصدش حاجه سيادتك يعني ... الف هنا ... مطرح ما يسري يمري. - متقصدش حاجه ازاي دا انت عينك هتطلع على الاكل. ... كدا غلط. ... على فكره دا علاج الدكتور أجبرنا عليه. ... دا لمصلحتكم على فكره ... متغيرش الموضوع لو سمحت. - ألف سلامه عليكم ... ربنا يكون في عونكم ... اتفضل حضرتك كمل كلامك ... إحنا أصلا مش بنحب الفسفور ... بيتهيألي ٣ سندوتشات فول دا إسراف. هم ٢ كفايه و لو حضرتك تحب ممكن واحد و نقسمه على بعض. ... ألف هنا. ... أقصد ربنا يشفي الدكتور .

  - أيوه يا محمد ... سامعني ؟ ... أنا بكلمك من مكتبنا الجديد ... أيوه اتنقلنا تاني ... بيقولوا هيزودوا عدد الناس اللي في إدارة البلالام و المكتب بتاعنا رقم ١٠٠ اللي اتنقلنا فيه في يناير ٢٠٣٠ هيناسبهم أكتر مننا ... معلش استحمل ... خلاص قلتلك معلش ... هبعتلك اللوكيشن خد اول سفينه و تعالى ... متنساش هات معاك ميه الله يكرمك هموت من العطش.

  - بس يا صاحبي هي دي الحكايه ... و كل لما أكلم حد يقولي سيب الناس في حالها دي أرزاق ... غلبت أفهم فيهم إني مش بتكلم عن الأرزاق أنا بتكلم عن العدل و المنطق ... كل اللي على لسانهم كل عيش كل عيش. - طيب ما تسمع كلامهم و كل عيش. - يا سيدي ما هو أنا باكل عيش أهو ... أهو باكل و بحمد ربنا ... انت هتعمل زيهم . - اسمعني بس. ... انت بإيدك تعمل حاجه ؟ - لا بإيدي و لا برجلي. ... انا بس مش قادر أبقى أبو الهول اللي كسروا مناخيره و بيكتبوا على جسمه للذكرى الخالده و هو لا حس و لا نفس. - طيب عايز ايه طيب ... انا دماغي صدعت منك ... طالما مفيش حاجه تعملها اسكت و كل عيش. ... خلي الناس في حالها دي أرزاق. - تصدق إن أنا غلطان اني اتكلمت معاك. ... بكره يجي عليك الدور و تجيني تشتكي و ساعاتها حتى كل عيش مش هقلهالك ... و هفكرك بالمثل اللي بيقول. "أكلت يوم أكل الثور الأبيض"

  قوم يا هندسه وراك حاجات كتير لازم تعملها - أقوم إزاي و العفاريت دي محصراني ... خليني هنا في الأمان. - عفاريت إيه بس ... يا هندسه عيب انت كبير. - انت ازاي مش شايفها ... بلاش مجازفه ... طيب ساعدني و اطردهم من هنا. - يا هندسه دي أوهام ... عيب متضحكش الناس عليك ... يلا كفايه اللي راح. - طيب ساعدني. - انت حبيبي و الله بس لو ما ساعدتش نفسك محدش هيساعدك ... القرار قرارك.

  - إيه اللي بيحصل هناك دا؟!!! ... الحق يا هندسه ... بص هناك وراك بسرعه. - بص انت براحتك و لو ليك مزاج روح هناك. - اروح فين يا عم دي معجنه ... طيب بص بس وراك. - بصيت ورايا كتير لما بقيت زي ما انت شايف... آن الآوان أبص قدامي شويه. - من فات قديمه تاه. - من فات قديمه بالاصول وصل للقمر ... يلا وسع السكه خليني أمشي أو أجري و لو عرفت هطير.

    - إسمه إيه الكتاب دا يا هندسه؟ - فن الإداره في أم الحضاره. - و هي الإداره بتختلف من بلد لبلد؟ - أكيد بتختلف ... بدليل إن في دول متخلفه و دول متقدمه و دول متقدمه جدا. - و هي الإداره من أسباب التقدم؟ - الإداره هي أهم أسباب التقدم. - طيب و انت بتقرأه ليه ... دا انت مدير بالفطره. - أهو كل شويه حد يقولي إعمل كذا انت مدير و متعملش كذا انت مدير ... يعني قلت أريح نفسي و أقرأ الكتاب اللي كلهم بيطبقوه. - و الكلام اللي بيقولوه دا جديد عليك؟ ... و هل كلامهم صح؟ ... معلش أصل باين على وشك إنك مش مقتنع باللي بتقرأه. - يا عزيزي أحيانا بنتعلم بعض الخدع مش علشان نخدع بيها الناس لكن علشان منتخدعش بيها ... نتعلم الشر علشان نغلبه و ميغلبناش.