- شنطتك دي يا أستاذ؟
- أيوه هي شنطتي ... خير في حاجه؟
- قاعد بعيد عنها ليه ... مخاصمها ؟... هههههه.
- إيه يا أستاذ الاستظراف دا!! ... خليك في حالك لو سمحت.
- هدي أخلاقك بس ... متزعلش ... أنا بس مستغرب الموقف ... معلش أصلي فضولي شويه ... و انت شكلك بتحب تحكي.
- في دي عندك حق ... طيب هقولك و حاول تفهم من غير أسئله كتيره ... أنا قاعد بعيد عنها علشان متضغطش عليه زي كل مره و تخليني أتسرع في اتخاذ القرار.
- هي مين اللي هتضغط عليك؟ ... الشنطه؟!!!
- و بعدين معاك ... مش قلت بلاش أسئله ... أيوه الشنطه ... شوف ... طول ما انت مش ماسك شنطتك في إيدك بتحاول تصبر و تستحمل و تدور على الإيجابيات اللي تخليك تستمر ... لكن أول ما تمسكها بتشوف الحلو وحش و الوحش أوحش و الصغيره كبيره و ساعتها قدرتك على إتخاذ القرارات الصحيحه بتقل جدا و بتقبل اللي المفروض متقبلوش ... فهمت؟
- بصراحه لا ... لكن اتعلمت اني مسألش حد باين عليه إنه.... ههههههه
- إخرس قطع لسانك ... أنا أعقل من بلدك بحالها ... منها لله الشنطه اللي خلتني أجي بلدكم.
تعليقات
إرسال تعليق