كش ملك

 

- يا عم الكمبيوتر استهدى بالله كدا و متخدهاش على أعصابك ... إيه يعني غلبتك يجي مية مره ... عادي يعني.

- عادي ازاي بس ... يعني كل الإمكانيات المتقدمه اللي عندي دي و كل شويه اتغلب.

- الموضوع و ما فيه إن الذكاء حاجه و المكر حاجه تانيه ... البشر عندهم قناعه إن ممكن نضحي بالبعض لمصلحة الكل و دي حاجه مش عندك إلا إذا برمجناك عليها ... احنا ممكن عادي نعمل عكس اللي في نيتنا و لما نتلام نقول إن نيتنا خير و مكناش نقصد و ربك رب قلوب و كدا يعني.

- يعني أنا غلطان علشان بتعامل بالمنطق و الحسابات المظبوطه و نيتي صافيه .

- لو سألتني أدام حد هقولك لا إنت صح و اثبت على مبادئك و يا بخت اللي قلبه أبيض و نيته صافيه ... بس علشان انت صاحبي هقولك الحقيقه ... إنت غلطان و ستين غلطان ... يلا العب ... كش ملك .