بياع البلالين

 

- عمو يا عمو يابتاع البلالين ... اديني بلونه الله يخليك.

- لو عليه يا قمر يا صغنن كنت اديهوملك كلهم.

- طيب و ايه اللي مانعك ... اديهوملي و انا هدعيلك ... و لا اقولك خد المصاصه دي و كمان هديلك نص جنيه.

- لا مش عاوز حاجه ... بس كلام في سرك دول مش بلالين... اوعي تقولي لحد ... دول ناس بس مسخوطين.

- ايه!! ... يا عمو انا صغيره بس مش هبله.

- أنا هفهمك ... دول ناس طلعوا لفوق قبل الاوان فدماغهم لفت و الهوا ملاهم ... و الغرور يا حبيبتي خلاهم زي المجانين ... فضلوا يدوسوا على اي حاجه تقابلهم ... لحد ما وقعوا في البير السحري اللي خلاهم زي ما انتي شايفه.

- طيب و انت واخدهم على فين؟

- على أكبر ميدان في المدينه ... و بالدبوس اللي معايا هفرقعهم واحد ورا التاني ... تيجي معايا؟

- لا يا عمو ... ماما قالتلي متمشيش ورا حد أهبل ... بااااي.